Act 8 | ASO | STEP | Bili hilikevo Saulo' a'minemu' lamine' giline' ve. A'mine gamene nene Izesu' evenele Zelusalemi ebeku' mulise milaa' ave api' igi goboni naba mili-ngidi minani'. Goboni mili-ngidi nizavo hutile' igi vi Zudaia misuboukosi Samalia misuboukisi vi osu' likevo aposolo angise'inevo' Zelusalemi ebeku' minani'.

Acts 8

1 Bili hilikevo Saulo' a'minemu' lamine' giline' ve.

Izesu' Evenele Zuho Saulo' Goboni Molo-ngidine' Gamazi

A'mine gamene nene Izesu' evenele Zelusalemi ebeku' mulise milaa' ave api' igi goboni naba mili-ngidi minani'. Goboni mili-ngidi nizavo hutile' igi vi Zudaia misuboukosi Samalia misuboukisi vi osu' likevo aposolo angise'inevo' Zelusalemi ebeku' minani'. 2 Ido' mono' gili lamine' ave linge ma Setehano'ni ive nama naba i-di mini galese izi-dani'. 3 Galese izi-dikevo Saulo' aza Izesu' evenele zuho ngebelo osu' lolosa ogo lovo o ngemo numu'ningu' numu'ningu' dizo vene' vemoho' gelelehe' malelehe' ogo do lemo na'nava numungu' hulo-ngedaa' ine'.

Samalia Misubou' Izesu' Monovo Li-ngimi'mi Vani'

4 Ne'mine neivo hutile' igi vave ingine hutile' igi vado' vado' vi numudo' namado' Izesu'nimu' gamazi lamine' li-ngimi' ngimi' igi minani'. 5 Mini Hilipo' Samalia ebeku' lomo vo O'moso'mo do lu' izelive lo imiselelesa live nene Izesu' ve lo lo-ngemo minine'. 6 Lo-ngemo neivo evene' muki' nene gamazi line' gili hamo' igi gili lanite' gili ato ato' suno dani' nene ningani'. 7 Evene' lu'ningu' minani' sikalahu' goloso muki' ngimisele hulavo geke' naba li limi vani'. Ido' lavo evene' gizeho' numuno avesi gebili nabilisi muki' lamine' ani'. 8 Ne'mine ogavo Samalia ebeku' evene' ngolize naba izani'.

9 Ido' a'mine ebe' nabau' ve ma minine' gulive Simoni'. Aza gamene ha'na luso ve lolo' ogo mino naza guve'nesi ve nouve lo Samalia aleve muki' go'ine izaa' ine'. 10 Ne'mine neivo dizi minani' ido' limi minani' nene ezemu' gilavo dizine'. Ado' aza nene O'moso'mi amuzo malehe monovo've ato ato' minanguti' monovo ma ngivile' ogo amuzo molo minine' ve li laa' nani' nene dosa O'moso gele vine' neive li gili lani'. 11 Ne'mine li gamene ha'na avazaha nite' dangumu' sizaga li'mi vi eze gamazi gili di vi eita gi'mizani'. 12 Ne'mine igi minani'za Hilipo' aza O'moso'mo gizebo o-ledeline' mamukisi ido' O'moso'mo do lu' izelive lo imiselelesa live nene Izesu' neingumukisi mono' gamazi lamine' nene lo-ngemavo gili ele'vole' igi vene' vemoho' muki' noso hilani'. 13 Simoni' asi'vesi gele ele'vole' ogo noso holani'. Holo Hilipoda vo gi'mizo mono Hilipo' ato ato' suno do soto' ine' nene ningo sizaga lo-do minine'.

14 Samalia aleve O'moso'mi gamazi gili dikevo Zelusalemi ebeku' minani' aposolo nete a'mine gamazi gili Petolongi Zohanengi engita ngimiselikevo vasine'. 15 Vi heteli a'mine Samalia aleve ingine Guvelesi ve Izesu' gulivelo' noso hilani'za O'moso'mi Sikahalu' olihe engita lemamivo haza minani' nenako nemu' O'moso'mi Sikalahu' engita lemo minelive li O'mosola lasine'. 17 Ne'mine igi a'ine godo'nido' hitikesivo O'moso'mi Sikalahu' engita lemo ogo minine'. 18 Aposolo netise a'ine godo'nido' hitikesivo O'moso'mo Sikalahu've ngimine' nene Simoni' ningo engita moni do vo ti' lo lo-ngimine': 19 Moni ma lengemekuvo dalisize. Nazasi ve ma zahi godololo' a'ne hitelohe. Hitekuvo O'moso'mi Sikalahu' ezela lemo minelingumu' a'mine di nizasine' amuzo ma nimilizo line'. 20 Lavo Petolo' ti' lo lo-imine': O'moso'mo amuzo've haza lehize-ledaa' neine' nene moni hulo dalove lo nolabe. Nemu' gei' monikasi okongasi labuluvo oloseive. 21 O'moso'mo gei' luka ningine' nene lisihe' amivo dusine' gono nene gei' dalinido' lisihe' amiline' ogako nemu' damolosane. 22 Gaza lukau' lihime neine' ne'mi gihile ekese'vesi nalinido' mino ido' monovo goloso ne'mo angalo' do gili' lo neivo ogo molo mineline' akalo' nene nane lo ningo gele nouze. Nemu' nene gaza goloso nite' daine' mene hulo luka do velepe' izo lukatunu' gelaine' lihime mene hulo-nedelive lo Guvelesi vela amuzo molo lozo. 24 Ti' lo lavo Simoni' ti' lo line': Lingine nenikumu' nene lasine' inite' nenita soto' amilive li O'mosola lilizo lo line'.

25 Aposolo ingine Izesu' monovo've li soto' igi Guvelesi ve'mi gamazi li-ngimi osu' li Zelusalemi ebeta di tine' mili nivi Samalia vetida ebe' mukiku' mono' gamazi lamine' nene li-ngimi'mi vasine'.

Hilipo' Aza Etiopia Ve Naba Ma Izesu' Monovo Lo-imine' Gamazi

26 Ne'mine nasivo Guvelesi ve'mi angelo' mali'mo Hilipo'ni ti' lo lo-imine': Gaza oto aka ma Zelusalemi ebetoti' eza gahevela lomo vo ebe' ma Gaza nela heteleline' akalo' nene lomo vozo. A'mine aka nene ebe' hadivela viline' akamu' noluve. 27 Ne'mine lo lo-emavo Hilipo' nene oto lomo vine'. Novivo Etiopia misubou' ve naba zunoku' ma minine' aza ve naba lolo' ogo Etiopia aleveliti vene' guve'inesi vene' naba engi' no'ninguti' Kadake ve lani' ei' ne gelekele' o-do moni heneni'velo' gizebo o-do minaa' ine'. Aza Zelusalemi ebeta O'moso opo'ni lo-emelesa dizidoti' 28 tine' molo nolemo hosi izelite gelelehe' iga' ani' kalisiu' dizo novo O'moso'mi gamazi lo soto' oga' ive polohete Isaia' gizine' gamazi nogativo 29 Sikalahuli'mo Hilipo'ni ti' lo lo-imine': Gaza volene kalisilo' avito' vozo. 30 Lavo loti' izo avito' vo polohete Isaia' gizine' gamazi gato neivo gelo ti' lo longo' o-dine': Gamazi nogatane' nene monovo've gele nabe. 31 Lavo ve mali'mo lo-neme' neme' amiline' nene monovo've nado gelelove lo kalisiu' dizanivo nezesi minelesive lo Hilipo'ni lo-emavo kalisiu' dizavo maka' minasine'.

32 Mono' godolouti' gamazi gatine' nene ti' lo minine':

Belelone li sipisipi ize di iga' ani' ne'mini ezesi ele'mizi ani'.
Ido' zopovo'ine nihukavo
sipisipi angale ingine no'ine mili geke' lisa'mani' ne'mine ogo
azasi gamazi gopo lamive.
33 Mulumo ido' ovozo inite' di-di ei' lihime nomido' di lisihe' i-dami
goni' gopo i-dani'.
Misubou' ogo molo iline' gamene nene izi huki-di bilikenako
eze zuho mamu' zaho lo soto' ilive.
34 Gamazi ti' lo minine' nene gato a'mine ve nene ti' lo Hilipo'ni longo' o-dine': Gaza lo-nemezo. Geleloze. Polohete zahingumu' line' neve. Asi'vemu' line' nehe ve gohi mamu' line' neve. 35 Lavo Hilipo' nene a'mine mono' godolouti' gamazi apizo lo'mo novo Izesu'nimu' gamazi lamine' imine' molo lo-imine'. 36 Ne'mine igi akalo' nivi nosolo' ma hetelasine'. Heteli ve naba aza Hilipo'ni lo-imine': Ningezo. Noso me ma neive. Noso holo-nedeliningumu' nene o've loso' ne nomive. Olo. 38 Ne'mine lo dalavamu' kalisi do minezo lavo kalisi do neivo Hilipokisi ve nabasi makato' nosou' limasine'. Limi Hilipo' ne'mo ve naba nene noso holo-dine'. 39 Holo-davo nosouti' dizikesivo O'moso'mi Sikalahu' ne'mo Hilipo'ni geto ele'mizo vavo ve naba aza eze nene gohi ningamine'za akalo' nene olize ize'mo vine'. 40 Ido' Hilipo' nene Azoto ebeku' soto' ogo gomu' a'mine vine' akala minani' numuno mukiku' nene Izesu'nimu' gamazi lamine' ne lo-ngemeka' ngemeka' o'mo vo Kaesalea numuda vo heteline' ve.